इगतपुरीनामा न्यूज – इगतपुरी शहरात मोकाट आणि भटक्या कुत्र्यांचा सुळसुळाट वाढला असून, नागरिकांचे जीवन धोक्यात आले आहे. इगतपुरी नगरपरिषदेपासून अवघ्या काही अंतरावर एका चिमुकल्याच्या हाताचे लचके तोडल्याची थरारक घटना घडली. या घटनेनंतरही इगतपुरी नगरपरिषदेच्या सुस्तावलेल्या कारभाराबद्दल नागरिकांमध्ये तीव्र संताप उसळला आहे. मिळालेल्या माहितीनुसार, इगतपुरी येथील एका दुकानातून बाहेर पडत असताना एका आक्रमक मोकाट कुत्र्याने लहान मुलावर अचानक हल्ला केला आणि त्याच्या हाताचे लचके तोडले. सुदैवाने, परिसरातील नागरिकांनी तातडीने धाव घेत मुलाला कुत्र्याच्या तावडीतून सोडवले. गंभीर जखमी झालेल्या या मुलाला तातडीने पुढील उपचारासाठी इगतपुरीच्या ग्रामीण रुग्णालयात दाखल करण्यात आले. ग्रामीण रुग्णालयाच्या अधिकृत आकडेवारीनुसार, गेल्या सव्वा महिन्यात तब्बल १२९ जणांना मोकाट कुत्र्यांनी चावा घेतल्याची नोंद झाली आहे. विशेष म्हणजे, यामध्ये शहरातील खाजगी रुग्णालयांमध्ये उपचार घेतलेल्या रुग्णांचा समावेश नाही. जर ती आकडेवारीही जोडली, तर श्वानदंशाची शिकार झालेल्या नागरिकांची संख्या आणखी मोठी असण्याची भीती व्यक्त होत आहे.
एकाच दिवशी त्याच परिसरात मोकाट कुत्र्याने आणखी ३ जणांना चावा घेतल्याने खळबळ उडाली. या वाढत्या घटनांमुळे नागरिकांमध्ये भीतीचे वातावरण आहे. मात्र, एवढी गंभीर घटना घडूनही इगतपुरी नगरपरिषदेचे अधिकारी किंवा कर्मचारी घटनास्थळावर फिरकले नाहीत. नागरिकांचे फोनही उचलले जात नसल्याचा गंभीर आरोप नागरिकांनी केला. “प्रशासन एखाद्या निष्पाप नागरिकाचा जीव जाण्याची वाट पाहत आहे का?” असा संतप्त सवाल नागरिकांमधून विचारला जात आहे. नगरपरिषदेच्या प्रशासनाला वारंवार निवेदने देऊनही कोणतीही ठोस कारवाई होत नसल्याने इगतपुरीचे नगरसेवक भूषण जाधव, वसीम सय्यद यांनी तातडीने पुढाकार घेऊन खाजगी ‘जीवाश्रय ॲनिमल वेलफेअर’ टीमला पाचारण केले. या टीमसह नागरिकांच्या शर्थीच्या प्रयत्नांनंतर, दोन लहान मुलांसह एकूण सात जणांना लचके तोडणाऱ्या त्या मोकाट कुत्र्याला रात्री उशिरा पकडण्यात यश आले. यानंतर नागरिकांनी मोठा सुटकेचा निश्वास सोडला आहे. इगतपुरी नगरपरिषदेने या घटनेची गंभीर दखल घेऊन शहरात वेळीच भटक्या कुत्र्यांच्या निर्बीजीकरणाची मोहीम राबवावी आणि नागरिकांच्या सुरक्षिततेचा प्रश्न तातडीने मार्गी लावावा अशी मागणी संतप्त नागरिकांकडून केली जात आहे.