इगतपुरीनामा न्यूज – इगतपुरी तालुक्यात सुरू असलेल्या मुसळधार पावसामुळे नदी-नाल्यांना उधाण आले असून पूरस्थिती निर्माण झाली आहे. इगतपुरी जवळील पिंप्री शिवारात नदीकाठी असलेल्या आदिवासी कुटुंबांच्या घरात पुराचे पाणी शिरल्याने मोठे संकट निर्माण झाले होते. मात्र, प्रशासनाच्या सतर्कतेमुळे आणि बचाव पथकाच्या धाडसामुळे मोठा अनर्थ टळला आहे. पिंप्री शिवारातील नदीलगतच्या घरात पुराचे पाणी वेगाने साचल्याची माहिती मिळताच तहसील प्रशासन, पोलीस प्रशासन आणि फांगुळगाव येथील आपत्ती व्यवस्थापन टीम तातडीने घटनास्थळी दाखल झाली. पाण्याचा प्रवाह अत्यंत तीव्र असताना आणि पाऊस कोसळत असतानाही बचाव पथकाच्या सदस्यांनी छातीएवढ्या पाण्यात उतरून बचावकार्य सुरू केले. लाईफ जॅकेट आणि मजबूत दोरीच्या सहाय्याने अत्यंत बिकट परिस्थितीतून एका-एका नागरिकाला सुखरूप बाहेर काढण्यात आले. या थरारक रेस्क्यू ऑपरेशनमध्ये लहान मुले, वृद्ध, महिला अशा एकूण १६ आदिवासी बांधवांना पुराच्या तावडीतून सुखरूप बाहेर काढण्यात आले. विशेष म्हणजे, मानवतेचे दर्शन घडवत बचाव पथकाने एका मुक्या प्राण्याला (श्वानाला) देखील सुरक्षितपणे बाहेर काढले. पूरबाधित आदिवासी बांधवांना तात्काळ इगतपुरी येथील माहेश्वरी मंगल कार्यालयात हलवण्यात आले असून, तहसील प्रशासनातर्फे त्यांच्या राहण्याची आणि भोजनाची उत्तम सोय करण्यात आली आहे. इगतपुरीचे तहसीलदार अभिजित बारवकर, पोलीस निरीक्षक घनश्याम बळफ यांच्या मार्गदर्शनाखाली पोलीस उपनिरीक्षक गायधनी पुरवठा अधिकारी ललित पाटील, मंडळ अधिकारी जी. डी. कुलकर्णी, तलाठी सचिन कल्याणकर, विजय खादे, विनोद जागले, गणेश गणेशकर, ग्रामसेवक निलेश पाटील, हवालदार निलेश देवराज, कृष्णा गोडसे, करण ठाकूर, दत्तू गायकवाड, आपत्ती व्यवस्थापन टीम फांगुळगावचे कु. चेतन बजरंग म्हसणे, आदित्य अशोक म्हसणे, ओमकार रायबा भगत जितू भगत, कार्तिक म्हसणे, गणेश म्हात्रे, गणेश म्हसणे, नवनाथ भटाटे यांनी ही कामगिरी केली. व्हिडीओ बातमी पहा https://youtube.com/shorts/WN8CMBXGaNg?si=XJpd-gwKY8VxSieI
