इगतपुरीनामा न्यूज – कल्याण येथील मधील अविवाहित शिक्षिका संगीता मारुती चंदनशिवे रा. मोहने, आंबिवली, कल्याण यांची मालमत्ता हडप करण्यासाठी त्यांची हत्या करणारा आरोपी संतोष रमेश जाधव याला नाशिक ग्रामीण स्थानिक गुन्हे शाखेच्या पथकाने कामगिरी करून अटक केली आहे. वाडीवऱ्हे पोलीस ठाणे हद्धीत एसएमबीटी रुग्णालयाजवळ महिलेचा मृतदेह आढळून आला होता. पोलीस निरीक्षक धीरज महाजन यांनी दिलेल्या फिर्यादीवरून गुन्हा दाखल करण्यात आला होता. यानुसार नाशिक ग्रामीण स्थानिक गुन्हा शाखेला या प्रकरणी तपासादरम्यान आरोपींनी मृत शिक्षिकेच्या एटीएम कार्डचा वापर करून पैसे काढल्याचे समोर आले. एटीएमचे सीसीटीव्ही फुटेज आणि तांत्रिक विश्लेषणाच्या आधारे पोलिसांनी आरोपीचा माग काढून त्यांना बेड्या ठोकल्या. ठाणे गुन्हे अन्वेषण शाखेच्या कल्याण युनिटनेही या प्रकरणात काही आरोपी अटक केले आहेत. पोलिसांनी दिगंबर भागुजी आव्हाड वय ४८, रा. आसनगाव आणि तुषार मुरलीधर रत्नपारखी वय ५२, रा. मोहने आंबिवली या दोन मुख्य आरोपींसह संतोष रमेश जाधव या तिसऱ्या आरोपीलाही ताब्यात घेतले आहे. एकूण ३ आरोपींना अटक करण्यात आली आहे. चौथा आरोपी विनोदचंद्र ऊर्फ संतोष पांडे याचा शोध सुरू आहे.
संगीता चंदनशिवे वय ५३ या कल्याण चिंचपाडा येथील एका शाळेत शिक्षिका होत्या आणि सोबतच एलआयसी एजंट म्हणूनही काम करत होत्या. आरोपींना संगीता या अविवाहित असून त्यांची मोठी मालमत्ता असल्याची माहिती होती. नवीन एलआयसी पॉलिसी घेण्याच्या बहाण्याने आरोपींनी त्यांना आसनगाव येथील एका भाड्याच्या खोलीत बोलावून घेतले. खोलीत आल्यावर आरोपींनी त्यांना बेदम मारहाण केली. त्यांच्या संपत्तीच्या कागदपत्रांवर आणि बनावट मृत्यूपत्रावर स्वतःला वारसदार दाखवून जबरदस्तीने संगीता यांच्या स्वाक्षऱ्या घेतल्या. स्वाक्षऱ्या घेतल्यानंतर आरोपींनी संगीता यांचे नाक आणि तोंड दाबून त्यांची निर्घृण हत्या केली. पुरावा नष्ट करण्यासाठी त्यांचा मृतदेह कारमधून नेऊन सिन्नर घोटी एसएमबीटी रुग्णालयाजवळ टाकून दिला होता. संगीता या १४ जुलै रोजी घरातून निघाल्या होत्या, मात्र त्या परत न आल्याने त्यांच्या भावाने कोळशेवाडी पोलीस ठाण्यात त्या बेपत्ता झाल्याची तक्रार नोंदवली होती. १६ जुलै रोजी एसएमबीटी परिसरात त्यांचा मृतदेह आढल्यानंतर तपासाला वेग आला. आरोपींना वाडीवऱ्हे पोलिसांच्या स्वाधीन करण्यात आले आहे.
नाशिकचे पोलीस अधीक्षक डी. एस. स्वामी, अप्पर अधीक्षक विमला मॅडम, उपविभागीय पोलीस अधिकारी संजय बांबळे यांच्या मार्गदर्शनाखाली नाशिक ग्रामीण स्थानिक गुन्हे शाखा पोलीस निरीक्षक राहुल मोरे, वाडीवऱ्हेचे पोलीस निरीक्षक धीरज महाजन, पोलीस उपनिरीक्षक भोळे, सुदर्शन बोडके, पोलीस हवालदार प्रविण काकड, संतोष दोंदे, सुधाकर बागुल, शिरीष गांगुर्डे, रामकृष्ण लहामटे, सतीश घुटे, संतोष गांगुर्डे, सागर काकड, हेमंत गिलबिले, प्रदिप बहिरम, नवनाथ शिरोळे, केतन कापसे, आबा पिसाळ यांनी ही कामगिरी केली.